Respublika fənn olimpiadalarnın qalibləri ilə görüş keçirildi.
Fənn olimpiadalarının Respublika final turunun Xaçmaz rayonu üzrə qalibləri ilə görüş keçirilib.
Görüşdə Xaçmaz Rayon İcra Hakimiyyəti başçısının I müavini İlhamə Nəzərova, Rayon Təhsil Şöbəsinin müdiri Mədinə Nurməmmədova, Təhsil Şöbəsinin əməkdaşları, məktəb direktorları, fənn müəllimləri və qaliblərin valideynləri iştirak ediblər.
Görüşü RTŞ-nin müdiri Mədinə xanım Nurməmmədova açaraq ölkə Başçımızın hər zaman təhsil sahəsini diqqət mərkəzində saxladığını, bu sahəyə olan dövlət qayğısından, şagirdlər arasında keçirilən fənn oimpiadalarının yüksək əhəmiyyətindən danışıb, Respublika final turunun qaliblərini təbrik edib, şagirlərinin uğur qazandığı fənn müəllimlərinə, onların valideynlərinə təşəkkürünü bildirib.
Sonra fənn olimpiadalarının Rayon Təşkilat Komitəsinin koordinatoru Azad Bədəlov 2018-2019 -cu tədris ilində keçirilmiş fənn olimpiadasının, həmçinin fənn müsabiqələrinin nəticələri haqqında geniş məlumat verib, şagirdləri qazandıqları uğur münasibətilə təbrik edib.
Görüşdə qızıl medal mükafatçısı Ceyhun Əsədov bildirib ki, olimpiadada uğur qazanmaq, qarşısına qoyduğu məqsədə nail olmaq üçün daha çox səy göstərib, çəkdiyi əziyyətin bəhrəsini əldə etdiyi üçün çox sevinir. Əldə etdiyi nailiyyətlərə ölkəmizdə elmə, təhsilə göstərilən diqqət və qayğıya görə ilk növbədə ölkə prezidenti cənab İlham Əliyevə, bu sahədə ona dəstək verən fənn müəlliminə öz dərin təşəkkürünü bildirib.
Daha sonra söz Xaçmaz Rayon İcra Hakimiyyətinin başçısının I müavini İlhamə xanım Nəzərovaya verilib. İlhamə Nəzrova İlk öncə olimpiada qaliblərini təbrik edib, onlara ən xoş arzularını bildirib, qaliblərə bu yolda uğurlarının davamlı olmasını arzulayıb. İlhamə Nəzərova qeyd edib ki, istedadlı gənclərin vaxtında üzə çıxarılması ölkənin dayanıqlı inkişafının və işıqlı gələcəyinin təminatıdır.
Zona turunun iştirakçısı olan 105 nəfər şagirddən 9 nəfəri Respublika final mərhələsində iştirak edib, onlardan Ş.Sədiyev adına Qımıl-qışlaq kənd tam orta məktəbin XI sinif şagirdi Ceyhun Əsədov Azərbaycan dili və ədəbiyyatı fənnindən I yer tutaraq qızıl medala, Arzu qəsəbə tam orta məktəbin VIII sinif şagirdi Amin Mirişov tarix fənnindən III yerlə bürünc medala, C.Cəbiyev adına Nərəcan kənd tam orta məktəbin XI sinif şagirdi Hürü Məmmədova riyaziyyat fənnindən III yerlə bürünc medala, Ə.Fətəliyev adına Bayoba kənd ümumi orta məktəbin IX sinif şagirdi Əfsan Xasiyev çoğrafiya fənnindən III yerlə bürünc medal mükafatına layiq görülüblər.
Qeyd edək ki, 25 may 2019-cu il tarixdə keçirilən Respublika fənn olimpiadalarının final mərhələsində 49 nəfər qızıl, 94 nəfər gümüş, 156 nəfər bürünc olmaqla ümumilikdə 299 nədər qalib olub.
Sonda Xaçmaz Rayon İcra Hakimiyyətinin hədiyyələri qaliblərə təqdim edilib və birgə xatirə şəkli çəkdirilib.
